துறவு நிலைக்க வேண்டும்

ஆசை துறந்தார் போல் உணர்கிறேன்
வேசம் இல்லையா என ஆராய்கிறேன்
மின்மினிப் பூச்சியாய் சிந்தனைகள் உலவ
நிச்சயமாய் கண்டறியப் புறப்பட்டேன் என்னுள்ளே!

காந்தம் போலே ஆசை, இழுக்கும்,
காற்றில் மின்னும் வண்ணத்துப்பூச்சி போல்
கண்ணைக் கவர்ந்து நெஞ்சை அள்ளும்
எண்ணம் போலே மிதக்கச் சொல்லும்

உண்பதில் ஆசை, உடுப்பதில் ஆசை
உற்றார் அன்பைப் பெறுவதில் பேராசை!
தன் புகழ் நாலு பேர் பாடிக் கேட்க ஆசை,
எண்ணம் முழுமையும் கொட்டித் தீர்க்க ஆசை

செவியில் நுழைந்து மனம் கவ்வும் இசை
கவியின் சிந்தை மொழியில் காணும் அழகு,
வெள்ளித் திரையின் பாத்திர இயல்பெலாம்
உள்ளே பூட்டி, வளர்க்கும் கனவில் ஆசை

கணவன், பிள்ளைகள் அமைதி கொள்ள ஆசை
கண் கவர் பொருட்கள் தனதாக்க ஆசை
கட்டிலில் கால்கை நீட்டி ஓய்வெடுக்க ஆசை
ஆட்டி வைக்கும் ஆசை ஆட்படுத்தும் ஆசை

காந்தம் காட்டி பார்க்கிறேன், பரீட்சித்து,
சாந்தமாய்ப் பார்க்கின்றன இரும்பும் காந்தமும்
ஈர்க்கவில்லை எனை ஒன்றும் - வேண்டுகிறேன்
தீர்க்கமான மனம், இதுபோன்றே நிலைத்திட!